اک بھیانک تیرگی ہے روشنی اے روشنی
شمع جاں بجھنے لگی ہے روشنی اے روشنی
کیا کوئی بھٹکا ہوا جگنو ادھر بھی آئے گا
رات گہری ہو چلی ہے روشنی اے روشنی
آسمانوں پر ستارے ہیں نہ سینوں میں شرار
یہ قیامت کی گھڑی ہے روشنی اے روشنی
ختم کب ہوگا یہ احساس زیاں کا رت جگا
ایک اک لمحہ صدی ہے روشنی اے روشنی
ہم اندھیروں کے حواری بن کے زندہ ہیں مگر
زندگی شرمندگی ہے روشنی اے روشنی
اپنی قسمت میں ہے نوک خار یا شاخ بہار
پھول ہیں یا پھلجھڑی ہے روشنی اے روشنی
حسن جلیل اختر