غزل
کوئی بھی خوش ہو میں اپنی خوشی سمجھتا ہوں
میں زندہ شخص ہوں اور زندگی سمجھتا ہوں
کئی تو تم سے بھی بہتر ملے ہیں لوگ مجھے
مگر کمی ہے جو اس کو کمی سمجھتا ہوں
یہ وہ دکھاتا ہے جو روشنی دکھاتی نہیں
سو میں اندھیرے کو بھی روشنی سمجھتا ہوں
بہت سی چیزیں ہیں جو میری حد سے باہر ہیں
سو جتنی حد ہے مری میں وہی سمجھتا ہوں
چلا تو جائے گا لیکن نشان چھوڑ کے یار
اگرچہ دکھ کو بھی میں سرسری سمجھتا ہوں
الیاس بابر اعوان