اقرار سے آیا ہے نہ انکار سے آیا

اقرار سے آیا ہے نہ انکار سے آیا
مجھ کو جو مزا لذتِ گفتار سے آیا

ہر چند تھا وہ سارے زمانے سے گریزاں
پر میری طرف تیر کی رفتار سے آیا

کس واسطے سمجھوں میں اسے جان کا دشمن
جو شخص مرے پاس بڑے پیار سے آیا

میں بن پیے مخمور تھا کچھ اس کی نظر سے
کچھ اور نشہ زلف سے، رخسار سے آیا

حق بات کہوں برسراحباب و رقیباں
یہ حوصلہ مجھ میں مرے کردار سے آیا

مفقود ہے وہ عہد رواں کے شعراء میں
جو لطف مجھے،میر کے اشعار سے آیا

تھا سہما ہوا صبح کے اخبار سے ناصر
کچھ خوف اسے شام کے اخبار سے آیا

ناصر زیدی