غزل
دی ہے اگر حیات تمنا کئے بغیر
اب موت بھی عطا ہو تقاضا کئے بغیر
بازار زندگی ہے فقط گھومنے کی جا
کچھ بھی یہاں ملے گا نہ سودا کئے بغیر
میں بھی انا پسند ہوں لیکن کروں تو کیا
دل مانتا نہیں اسے سجدہ کئے بغیر
جلوہ نمود جسم ہے اور جسم ہے حجاب
پردے میں کوئی رہتا ہے پردہ کئے بغیر
منسوب کس سے ہوتی پھر آخر متاع دل
میں تم کو چھوڑ دیتا جو اپنا کئے بغیر
یہ کارنامہ ہے دل خود احتساب کا
میں پاکباز ہو گیا توبہ کئے بغیر
فریاد کس سے کیجئے اس چارہ ساز کی
جو چھوڑ دے مریض کو اچھا کئے بغیر
چپ رہ کے مطمئن ہیں نہیں جانتے سروشؔ
کچھ راز فاش ہوتے ہیں چرچا کئے بغیر
محمود سروش