زمیں رکی تو مجھے آسماں دکھائی دیا
اس آئینے میں مجھے تو کہاں دکھائی دیا
دریدہ عشق کی پوشاک پہ سجے تمغے
کہیں کہیں مجھے ان کا نشاں دکھائی دیا
میں کب کا چھوڑ چکا کارہستی ءخاموش
تری نظر سے مجھے اب جہاں دکھائی دیا
مہک رہی تھی ترے لمس سے مری دنیا
پس خیال مجھے اک گماں دکھائی دیا
عجیب عشق کدہ ہےکہ ڈھونڈ نے سے مجھے
جہاں جہاں میں گیا تو وہاں دکھائی دیا
بھٹک رہی تھی مری زندگی تجسس میں
کہ دور بستی میں اک سائباں دکھائی دیا
کسی کی آہوں سے سب خواب جل کے راکھ ہوئے
سلگتی آنکھوں میں مجھ کو دھواں دکھائی دیا
حسن رضا