اپنے اجڑے ہوئے گھر کو میں سجا کر دیکھوں
تری تصویر میں کمرے میں لگا کر دیکھوں
یہ تو طے ہے کہ تو روٹھا ہوا ہوگا اب تک
آ ذرا پاس تجھے پھر سے منا کر دیکھوں
اس سے ملنے تو کئی بار گیا ہوں ویسے
اس دفعہ گھر پہ اسے اپنے بلا کر دیکھوں
یہ بھی ممکن ہے کہ وہ تھام لے گرتے گرتے
اس کی جانب میں ذرا ہاتھ بڑھا کر دیکھوں
جانے کیا دیکھ کے ہنستا ہے وہ سوتے سوتے
اس کے خوابوں میں کبھی میں بھی تو جا کر دیکھوں
جو بھی ملتا ہے تجھے مل کے مہک جاتا ہے
میں بھی کیا تجھ کو ذرا ہاتھ لگا کر دیکھوں
وہ محبت کا تو قائل ہی نہیں ہے یاسر
لیلی مجنوں کے اسے قصے سنا کر دیکھوں
یاسر سعید صدیقی