وہ ہے اچھا بھلا بھی اور نہیں بھی
کہیں جس کو بُرا بھی اور نہیں بھی
خبر رکھتا ہے میری جانتا ہُوں
اُسے ہوگا پتہ بھی اور نہیں بھی
کریں تو کیا کریں بیمار اُس کے
وہی دے گا دوا بھی اور نہیں بھی
اندھیرا بزم میں روشن ہُوا ہے
چراغِ دل بُجھا بھی اور نہیں بھی
کبھی مدہوش بھی ہُوں ہوش میں بھی
مُجھے میرا پتہ بھی اور نہیں بھی
حقیقت خُوش گُمانی ساتھ لائی
گرا میں تواُٹھا بھی اور نہیں بھی
فقط آنسو گرائے اپنے خط پر
یوں اُس نے کُچھ لکھا بھی اور نہیں بھی
ڈرامائی بہت ہے عشق میں وہ
لگے مُجھ سے خفا بھی اور نہیں بھی
بہانہ خار کے چُبھنے کا کرکے
مری خاطر رُکا بھی اور نہیں بھی
زمیں جاوید مُشکل تھی غزل کی
مجھے ایسا لگا بھی اور نہیں بھی
جاوید احمد خان جاوید