Rahay No Rooz Ishrat Aafreen josh e bahaar afza
غزل
رہے نو روز عشرت آفریں جوش بہار افزا
گل افشاں ہے کرم تیرا چمن میں دہر کے ہر جا
نہ پوچھو کوئی عیش و خرمی کو عہد میں اس کے
کہ جس کے فیض سے گھر گھر ہے دور ساغر صہبا
ارسطو جاہ وہ فرخ نژاد اہل عالم ہے
کہ جس کے فضل و بخشش کا جہاں میں ہے علم برپا
دعا ہے یہ موالی کی تصدق سے ائمہ کے
رکھے سائے میں اپنے لطف کے تجھ کو علی مولیٰ
نہیں کچھ زیب اے مہر سپہر معدلت اس میں
عیاں چنداؔ پہ جو کچھ ہے نوازش یہ کرم فرما
ماہ لقا بائی چندا
mah laqa baaee chanda