کیا کیا ہوئے ہیں ہم پہ ستم کچھ نہ پوچھئے

غزل

کیا کیا ہوئے ہیں ہم پہ ستم کچھ نہ پوچھئے
نا گفتنی ہے قصۂ غم کچھ نہ پوچھئے

دل کا تو حال آپ کو ہم نے سنا دیا
جن مشکلوں میں آپ ہیں ہم کچھ نہ پوچھئے

گزرے بخیر کعبہ و بت خانہ سے تو ہم
اب سر کس آستاں پہ ہے خم کچھ نہ پوچھئے

آنکھوں میں اشک لب پہ فغاں دل میں اضطراب
کس مہرباں کے ہیں یہ کرم کچھ نہ پوچھئے

سمجھا ہوا تھا حسن کو ہم نے وفا سرشت
نکلا ہے کس طرح یہ بھرم کچھ نہ پوچھئے

میری نظر میں وقعت دیر و حرم ہے کیا
اے ساکنان دیر و حرم کچھ نہ پوچھئے

لے جا رہا ہے ذوق تماشا مجھے کہاں
اٹھتے ہیں کس طرف کو قدم کچھ نہ پوچھئے

پہنچا ہے آج نامۂ دل دار تو ہمیں
کیا کیا ہوا ہے زیب رقم کچھ نہ پوچھئے

حسن سخن میں لطف جو ہے کیا بتائیں ہم
ساحرؔ کے شعر ہی کی قسم کچھ نہ پوچھئے

ساحر سیالکوٹی