وقت کیا شے ہے پتہ آپ ہی چل جائے گا
ہاتھ پھولوں پہ بھی رکھو گے تو جل جائے گا
جس کو محفل سے نکالو گے نکل جائے گا
مگر ادبار تو ادبار ہے ٹل جائے گا
کہیں فطرت کے تقاضے بھی بدل سکتے ہیں
گھاس پر شیر جو پالو گے تو پل جائے گا
کہہ دیا تھا کہ یہ رہبر جو چنا ہے تم نے
صاف طوطے کی طرح آنکھ بدل جائے گا
وہ بدلتے ہوئے ماحول کا سانچہ ہی سہی
کوئی سکہ تو نہیں ذہن کہ ڈھل جائے گا
صبح مایوس گلستاں کی قسم پھر کہئے
باغبانوں کے دماغوں سے خلل جائے گا
میکدے آ کے وہ انسان بنیں یا نہ بنیں
حضرت شیخ کا ایمان سنبھل جائے گا
ستم و ظلم کی ٹہنی بھی نہیں پھل سکتی
آپ نے باغ لگایا ہے تو پھل جائے گا
فرض ہیں ہم پہ بیانات بصیرت اے شادؔ
جس کی قسمت میں سنبھلنا ہے سنبھل جائے گا
شاد عارفی