کہا یہ کس نے تجھے زندگی پڑی ہوئی ہے

غزل

کہا یہ کس نے تجھے زندگی پڑی ہوئی ہے
گزر بسر کو تو آوارگی پڑی ہوئی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ادھر ادھر کے فسانوں کو سن کے آج مجھے
پتہ چلا کہ یہاں موت بھی پڑی ہوئی ہے
۔۔۔۔۔۔۔۔۔۔۔۔۔۔۔۔۔
کواڑ کھول کے مت دیکھ مری جانب تو
یہاں چراغ نہیں دوستی پڑی ہوئی ہے
۔۔۔۔۔۔۔۔۔۔۔۔۔۔۔۔۔۔۔۔
یہ بدتمیز کہاں آگئے ہیں محفل میں
یہ کس سبب سے ہوا سرپھری پڑی ہوئی ہے
۔۔۔۔۔۔۔۔۔۔۔۔۔۔۔۔۔۔
روش روش پہ نئی سرزمین ہے ملتی
ضیائے قلب کہاں روشنی پڑی ہوئی ہے
۔۔۔۔۔۔۔۔۔۔۔۔۔۔۔۔۔۔۔
ہمارے حال پہ خوش ہو رہے ہیں ہم سفراں
ہمارے پاؤں میں زنجیر بھی پڑی ہوئی ہے
۔۔۔۔۔۔۔۔۔۔۔۔۔۔۔۔۔۔۔۔
خوشی خوشی میں تجھے چھوڑ جانے والا نہیں
قدم قدم پہ یہاں زندگی پڑی ہوئی ہے
۔۔۔۔۔۔۔۔۔۔۔۔۔۔۔۔۔۔۔۔
ترے سبب سے ہی لاہور آنا جانا ہے
ترے سبب سے ہی یہ ہتھکڑی پڑی ہوئی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قدم قدم سے ملاتے ہیں مسکراتے ہیں
نگاہ- عشق میں یہ دل لگی پڑی ہوئی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تمھارے بعد یہ لگتا ہے دل کے کمرے میں
تمھارے بعد جگہ ایک سی پڑی ہوئی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ندیم ہم پہ ہوا ہے سخن محبت کا
اسی لیے تو غزل دوہری پڑی ہوئی ہے

ندیم ملک