ابھی سینے میں دل اور آنکھ میں تصویر زِندہ ہے​

ابھی سینے میں دل اور آنکھ میں تصویر زِندہ ہے​
کوئی تو خواب ہے، جس کے لئے تعبیر زِندہ ہے​

​عجب اندیشۂ سُود و زیاں کے درمیاں ہیں ہم​
کہ فردِ جرم غائب ہے مگر تعزیر زِندہ ہے​

​پلٹ کر دیکھنا عادت نہیں تیری، مگر پھر بھی​
سُبک رفتارئ دُنیا، ابھی اِک تِیر زِندہ ہے​

​سِتم ایجاد لمحوں نے لبوں کو سِی دیا، لیکن​
ابھی دستِ دُعا میں حلقۂ تاثیر زِندہ ہے​

​ذرا تم خانماں برباد لوگوں کی طرف دیکھو​
اِن اُجڑی بستیوں میں کب سے شہرِ میر زِندہ ہے​

​جُنوں آثار شہروں سے ابھی رانجھا نہیں لوَٹا​
سمَے کی ٹُوٹتی پگڈنڈیوں میں ہِیر زِندہ ہے​

​گروہِ کُشتگاں میں بچنے والے ایک ہم ہی ہیں​
ہمارے سَر میں سودا، پاؤں میں زنجیر زِندہ ہے​

​سلیم اِتنا سمجھنے ہی میں عُمریں بیت جاتی ہیں​
نہ کوئی لفظ مُردہ ہے، نہ ہر تحریر زِندہ ہے​

​سلیم کوثر​