اب بھی ذروں پہ ستاروں کا گماں ہے کہ نہیں

اب بھی ذروں پہ ستاروں کا گماں ہے کہ نہیں
زیر پا اب بھی ترے کاہکشاں ہے کہ نہیں

اب بھی وہ جشن طرب ہے کہ نہیں مقتل میں
اک تماشے کو ہجوم نگراں ہے کہ نہیں

اب بھی فریاد بہ لب ہے کہ نہیں راندۂ عشق
وہ ہی بے چارگیٔ دل زدگاں ہے کہ نہیں

کہیے نم ہے کہ نہیں چشم ندامت آثار
قافلے والوں کو احساس زیاں ہے کہ نہیں

ہر گل نم کے لیے ہے کہ نہیں گردش چاک
یہ جہاں کارگہ کوزہ گراں ہے کہ نہیں

وہ مرا دشمن جاں ہے کہ نہیں سنگ بدست
رائیگاں کوشش صد شیشہ گراں ہے کہ نہیں

تشنہؔ کچھ سب سے جدا ہے کہ نہیں تیری غزل
منفرد سوداؔ کا انداز بیاں ہے کہ نہیں

عالم تاب تشنہ