غزل
تجھ چہرۂ گل رنگ نیں خوباں کو گلگونی دیا
تیرے لب یاقوت نے مجھ دل کوں پر خونی دیا
دیوانہ ہو گھر چھوڑ کر جاتا رہا صحرا طرف
اے رشک لیلیٰ تو نے جب عاشق کو مجنونی دیا
مضمون عالی باندھتا ہوں تیرے قد کی وصف میں
مجھ طبع کوں صحبت نے تیری جب سے موزونی دیا
برجا ہے گر مغرور ہوں اپنے دلاں میں شاعراں
نرخ سخن کوں تجھ سخن فہمی نے افزونی دیا
فرحت کی صورت نیں نظر آئی مجھے اے نور چشم
تیری جدائی میں مگر عالم کو محزونی دیا
دیدار کی ہے اشتہا صاف اے طبیب مہرباں
تجھ شوق نے گویا مجھے معجون زرعونی دیا
کہتے ہیں سارے برہمن مجھ مبتلاؔ سوں اے صنم
زنار گیسو کھول توں ہر دل کوں بفتونی دیا
عبید اللہ خاں مبتلا