ظالم بتوں سے آنکھ لگائی نہ جائے گی
پتھر کی چوٹ دل سے اٹھائی نہ جائے گی
ہونے دو ہو رہے ہیں جو الفت کے تذکرے
بگڑوگے تم تو بات بنائی نہ جائے گی
کہہ دو یہ شمع سے کہ عبث تو ہے اشک بار
پانی سے دل کی آگ بجھائی نہ جائے گی
چلمن ہو یا نقاب ہو یا پردۂ حیا
صورت تری کسی سے چھپائی نہ جائے گی
ممکن ہے تیر ناز سے دل کو بچا بھی لوں
لیکن نظر کی چوٹ بچائی نہ جائے گی
آنکھیں خدا نے دی ہیں تو دیکھیں گے حسن یار
کب تک نقاب رخ سے اٹھائی نہ جائے گی
توبہ کو منہ لگا کے خجل ہوگے تم جلیلؔ
جام و سبو سے آنکھ ملائی نہ جائے گی
جلیل مانک پوری