قلم اُداس ہے اب کونسا بیاں لکھ دوں
سزائے موت ملے گی اگر فغاں لکھ دوں
سکھائے مجھ کو نشیب و فراز صدموں نے
گئی جو عمر اُسے کیسے رائگاں لکھ دوں
تڑپ رہا ہے وہاں تُو یہاں ہوں میں بیتاب
میں شش و پنج میں اب کس کی داستاں لکھ دوں
کِیا ہے کون اذیّت سے آشنا مجھ کو
بہت تھا شوق تجھے دوست پاسباں لکھ دوں
تمہارے طرزِ تعلق کو اعتراض نہ ہو
ہُوا میں کیسے محبت سے بدگماں لکھ دوں
فلک , زمین , سمندر , صبا, دھنک, خوشبو
تمہارا نام نظر سے کہاں کہاں لکھ دوں
بنا ہے حسن تماشا حریص آنکھوں میں
سمجھ جو آئے تجھے کونسی زباں لکھ دوں
نہ جانے صبر تجھے کیسے آگیا منظور
ہوئے نہ ختم جو دستورِ امتحاں لکھ دوں
احمد منظور