مجھ سے تری زباں کا نہ طعنہ سہا گیا
اتنا تو میں برا نہیں جتنا کہا گیا
میں خوگرِ وفا ہی رہا تیرے پیار میں
تجھ سے مگر وفا پہ نہ قائم رہا گیا
رونا ہے اب یہ کیسا بھلا کیوں پکار ہے
جاتے ہوئے کیوں آنکھ سے موتی بہا گیا
مدت سے میری بات سے تجھ کو تھا اختلاف
کہتا ہے اب، کہ یار کوئی بے بہا گیا
تجھ کو بھی میرے ہجر نے جینے نہیں دیا
مجھ سے بھی تیرے بعد نہ یکسر رہا گیا
دونوں اداس ترک تعلق سے تھے مگر
یہ کاروانِ عمر سبھی کچھ بہا گیا
خاور کمال صدیقی