مرہمی باتوں سے تیری زخمِ دل سلتے رہیں
کاش ہم دونوں یونہی اکثر کہیں ملتے رہیں
یونہی تیرے پیار کی شبنم سدا گرتی رہے
دل کے آنگن میں تری باتوں کے گل کھلتے رہیں
تو اجالے کی کرن ہے میں اندھیرا رات کا
کیا ہی اچھا ہو کہ دونوں شام کو ملتے رہیں
گنگناؤ تو فضائیں گنگنائیں ساتھ ساتھ
مسکراؤ تو ہمیشہ پھول ہی کھلتے رہیں
کس قدر دل کش تھا تیرا مجھ کو کہنا الوداع
کہہ رہا تھا دل حنائی دست یہ ہلتے رہیں
یاد ہے عظمی تمہیں بیتے دنوں کی آرزو
ان سے ہم ملتے رہیں اور ہم سے وہ ملتے رہیں
عظمی جون