غزل
تمہارا ذوق پرستش مجھے عزیز مگر
میں اس زمین کی مٹی مجھے خدا نہ کہو
تمہارے ساتھ اگر دو قدم بھی چل نہ سکوں
تو خستہ پا ہوں مجھے مجرم وفا نہ کہو
یہ ایک پل کی دھڑکتی حیات بھی ہے بہت
تمام عمر کے اس روگ کو برا نہ کہو
اس ایک خوف سے لب سی لیے تمہارے حضور
کہ حرف شوق کو اظہار مدعا نہ کہو
یہ بے رخی کا گلا مجھ سے پہلے خود سے کرو
اسے نگاہ کا یک طرفہ فیصلہ نہ کہو
گزرتے وقت کے مرہم سے بھر نہ جائے کہیں
اس ایک زخم کو چاہت کی انتہا نہ کہو
میں ایک زندہ حقیقت ہوں ایک پل ہی سہی
تمہارا عکس ہوں تم تو مجھے فنا نہ کہو
پروین فنا سید