ہجر کی شب زلف برہم کا خیال آتا رہا

غزل

ہجر کی شب زلف برہم کا خیال آتا رہا
اک نہ اک ہر دن مرے سر پر وبال آتا رہا

شکر ہے تاریک دل میں روشنی کے واسطے
گو تصور میں سہی اس کا جمال آتا رہا

ہے کرم اس کا کہ ہم سے بے بصر کے واسطے
عالم امثال میں وہ بے مثال آتا رہا

بھولنے والے کو آخر دل بھلائے کس طرح
بے خیالی میں بھی جب اس کا خیال آتا رہا

میں نے اپنی خستگی کی داد پائی اس طرح
میرے عرض حال پر ان کو جلال آتا رہا

بس یہی کیا کم ہے میری صاف گوئی کی دلیل
ان کے دل میں میری جانب سے ملال آتا رہا

کیا بگڑ جاتا جو ہو جاتی توجہ کی نظر
مدتوں در پر گدائے بے سوال آتا رہا

مجھ کو بیخودؔ جب کبھی آیا ہے توبہ کا خیال
دیر تک اپنے گناہوں کا خیال آتا رہا

عباس علی خان بیخود