غزل
تمہارے اشکوں سے میں دل کو صاف کرتی ہوں
میں آج ابھی تمہیں دل سے معاف کرتی ہوں
مری حیات میں تم آگئے ہو بن کے شمع
تمہارے گِرد ہمیشہ طواف کرتی ہوں
خطاؤں کو نظر انداز کیوں کیا تیری
مرا قصور ہے میں اعتراف کرتی ہوں
نہ کرسکوں میں بُرائی کسی کی یا اللہ!
میں ایسی باتوں سے اب انحراف کرتی ہوں
نہ ایک لفظ حمایت میں تیری کہتی ہوں
نہ کوئی بات میں تیرے خلاف کرتی ہوں
سیا ہے اپنے لبوں کو کہاں کہاں میں نے
ثمرؔ میں آج نیا انکشاف کرتی ہوں
ثمرین ندیم ثمر