جشن برباد خیالوں کا منا لوں تو چلوں

جشن برباد خیالوں کا منا لوں تو چلوں
مژۂ شوق کو غم ساز بنا لوں تو چلوں

میری ہستی میں سمٹ آئے اندھیرے غم کے
شمع الفت کی ترے غم میں جلا لوں تو چلوں

دل بے تاب ٹھہر اشک تمنا کے طفیل
بزم فرقت کو سر شام سجا لوں تو چلوں

کیف طاری ہے بہت آج تصور میں ترے
اب ذرا ہوش کے ماحول میں آ لوں تو چلوں

ان کا دیدار مرے بس کا ابھی کام نہیں
اپنی نظروں سے حجابات اٹھا لوں تو چلوں

ابھی سیلاب پہ دریا ہے سفینہ بردوش
میں کسی موج کی آغوش میں آ لوں تو چلوں

جلوہ گر سامنے ہے آج مبینؔ ان کا جمال
پیاس آنکھوں کی ذرا اور بجھا لوں تو چلوں

سید مبین علوی خیرآبادی