آپ اگر اپنے خیالات نہیں بدلیں گے

آپ اگر اپنے خیالات نہیں بدلیں گے
تب تو اس دیس کے حالات نہیں بدلیں گے

خود کو بدلیں تو زمانہ بھی بدل جائے گا
ورنہ یہ ارض و سماوات نہیں بدلیں گے

ہے ترا شہر بدل دینے کا دعویٰ بے سود
جب تلک ملک کے دیہات نہیں بدلیں گے

یاد ہیں مجھ کو سبھی نظریں بدلنے والے
کیسے مانوں کہ وہ جذبات نہیں بدلیں گے

اے ہوا ! جاکے خزاں رُت کو یہ سمجھا دینا
سارے پیڑوں کے یہاں پات نہیں بدلیں گے

اک تغیر سے عبارت ہے نظامِ ہستی
چاند سورج مگر اوقات نہیں بدلیں گے

کوئی تو بات ہے جو ٹال رہے ہیں ہم کو
کیجئے وعدہ کہ اب بات نہیں بدلیں گے

اب دمِ مرگ ہے آجائیے ملنے ہم سے
اب کے ہم وقتِ ملاقات نہیں بدلیں گے

لاکھ سر پھوڑئیے سیما سے مباحث کیجئے
حق پہ ہیں اس کے خیالات نہیں بدلیں گے

عشرت معین سیما