تُمھاری باتوں پہ کُچھ اعتبار تھا ہی نہیں
وہ جس کو پیار کہا تُم نے پیار تھا ہی نہیں
میں کیسے ویدوں حکیموں سے مشورے کرتی؟
تمہارا پیار نشہ تھا ،بُخار تھا ہی نہیں
یہ میری آنکھیں ترے پاؤں سے لپٹتی گئیں
وگرنہ راہوں میں کوئی بھی خار تھا ہی نہیں
میں دربدر نہ بھٹکتی تو اور کیا کرتی
سوائے عشق کوئی اور کار تھا ہی نہیں
میں مات دے کے جو دُشمن کو اپنے گھر آئی
کسی کے ہاتھ میں پھولوں کا ہار تھا ہی نہیں
کِسی نے ہاتھ اٹھائے ہوئے تھے میرے لیے
سو میری پُشت پہ دُشمن کا وار تھا ہی نہیں
زریں منور