زمیں کے ساتھ لکھا آسمان کاغذ پر۔

Zameen kay sath likha aasman kaghaz per

غزل

۔۔زمیں کے ساتھ لکھا آسمان کاغذ پر۔۔
۔۔سجائے بیٹھے ہیں دونوں جہان کاغذ پر۔۔

ستارے۔پھول۔دھنک۔چاندنی۔صبا لکھے۔۔
۔۔بنا کے رنگوں سے اپنا مکان کاغذ پر۔۔

۔۔میں جو لکھوں اسے ویسا ہی رہنے دیتا ہے۔۔
۔۔میں کیا بتاؤں کہ کتنا ہے مان کاغذ پر۔۔

۔۔جو تم ہمیشہ یونہی بال و پر تراشوگے۔۔
۔۔پرندے لکھیں گے اپنی اڑان کاغذ پر۔۔

۔۔مرا وجود اسی روز سے ہے زخم زدہ۔۔
۔۔بنا کے دیکھی تھی اک دن کمان کاغذ پر۔۔

۔۔تھا مشغلہ ہی کچھ ایسا کہ ڈوبنا تو تھا۔۔
۔۔بھنور میں ناؤ رکھی بادبان کاغذ پر۔۔

۔۔بڑے ہنر سے کسی نے سراب لکھا تھا۔۔
۔۔سو تشنہ کاموں نے رکھ دی زبان کاغذ پر۔۔

۔۔چرا کے لے گیا کوئ مرے حروف حجاب۔۔
۔۔کہ انگلیوں کے ملے ہیں نشان کاغذ پر۔۔

حجاب عباسی

Hijab Abbasi