سودا زندہ ہے تو یہ تدبیر کریں گے

سودا زندہ ہے تو یہ تدبیر کریں گے
اس زلف گرہ گیر کی زنجیر کریں گے

غصے میں ترے ہم نے بڑا لطف اٹھایا
اب تو عمداً اور بھی تقصیر کریں گے

دیکھیں گے کہ جب آتے تھے آپ ایک ادا سے
ہو چیں بہ جبیں تکیہ بہ شمشیر کریں گے

یہ نالہ جاں کاہ پر از حسرت و درد آہ
تا بند ترے دل میں نہ تاثیر کریں گے

چمکا ہے ترا رنگ جو نظارے سے اپنے
پوچھ اہل نظر سے کہ وہ تقریر کریں گے

چندے جو بسر یوں ہوئی اوقات تو ہم یار
مکھڑے کو ترے عالم تصویر کریں گے

دل شاد رکھ انشا متفکر نہ ہو ہرگز
عقدے ترے حل حضرت شبیر کریں گے

انشاء اللہ خان