شامِ غم اوڑھے ہوئے بیٹھا ہوں اپنے لان میں
خواب میرے جل رہے ہیں تیرے آتش دان میں
ظلمتِ شب میں اجالوں کی عیادت کے لیے
اک دیا میں بھی جلا دیتا ہوں روشن دان میں
اس نے میرے گھر میں جس دن انجمن آرائی کی
سینکڑوں جگنو اتر آئے مرے دالان میں
جب شکستِ عشق پر ہنگامہ آرائی ہوئی
اپنے روز و شب مجھے دینے پڑے تاوان میں
ایڑیاں رگڑیں جب اس نے اپنے رب کے سامنے
آبِ زم زم ہوگیا آباد ریگستان میں
حوصلہ دیتا ہوں میں بھی رہروانِ شوق کو
سایہِ دیوار ہوں میں دھوپ کے میدان میں
شہر بھر کی تتلیاں آتی ہیں میرے پاس بھی
ہر طرح کے پھول شامل ہیں مرے گلدان میں
عکس اپنے دیکھ اپنے حال و مستقبل سنوار
آئنے شامل نہیں ہوتے کسی نقصان میں
سندھ کی دھرتی سے ہم کو بھی محبت ہے نثار
پھول ہم نے بھی کھلائے وادیِ مہران میں
ڈاکٹر نثار احمد نثار