مرے اندر روانی ختم ہوتی جا رہی ہے – Mere andar rawani khatam hoti ja rahi hai

مرے اندر روانی ختم ہوتی جا رہی ہے
سو لگتا ہے کہانی ختم ہوتی جا رہی ہے

اسے چھو کر لبوں سے پھول جھڑنے لگ گئے ہیں
مری آتش فشانی ختم ہوتی جا رہی ہے

سلگتے دشت میں اب دھوپ سہنا پڑ گئی ہے
تمہاری سائبانی ختم ہوتی جا رہی ہے

ہمارا دل زمانے سے الجھنے لگ گیا ہے
تمہاری حکمرانی ختم ہوتی جا رہی ہے

سمندر سے سمٹ کر جھیل بنتے جا رہے ہیں
ہماری بے کرانی ختم ہوتی جا رہی ہے

احمد خیال