رشتۂ جسم و جاں بھی ہوتا ہے​

رشتۂ جسم و جاں بھی ہوتا ہے​
ٹوٹنے کا گماں بھی ہوتا ہے​

​اس توہم کے کارخانے میں​
کارِ شیشہ گراں بھی ہوتا ہے​

​ہم سے عزلت نشیں بھی ہوتے ہیں​
عرصۂ لامکاں بھی ہوتا ہے​

​ہم بھی ہوتے ہیں اُس کی محفل میں​
رقصِ سیّارگاں بھی ہوتا ہے​

​بادِ صحرائے جاں بھی ہوتی ہے​
نغمۂ سارباں بھی ہوتا ہے​

​جوئے آبِ رواں بھی ہوتی ہے​
عکسِ سروِ رواں بھی ہوتا ہے​

​پھول کھلتے بھی ہیں سرِ مژگاں​
چاندنی کا سماں بھی ہوتا ہے​

​لوگ مل کر بچھڑ بھی جاتے ہیں​
اور یہ ناگہاں بھی ہوتا ہے​

​چشمِ آئینہ ساز میں شاید​
آئینہ کا گماں بھی ہوتا ہے​

​رسا چغتائی​

​