دل میں پنہاں غم محبت ہے

غزل

دل میں پنہاں غم محبت ہے
میرے پہلو میں میری جنت ہے

ترک الفت کے باد سمجھا میں
اس کی دوری میں کتنی قربت ہے

اپنی منزل پہ یوں کھڑا ہوں میں
جیسے کوئی مقام حیرت ہے

زندگی کی دعا نہ دو مجھ کو
زندگی موت کی علامت ہے

دیکھیں کب دار تک رسائی ہو
حق بیانی ہماری فطرت ہے

ہو اگر ذوق بندگی صادق
دل بھی اک مرکز عبادت ہے

میرا مسلک ہے دوستی شاداںؔ
ہر بشر سے مجھے محبت ہے

شاداں بدایونی