چور آئے نہیں چور لائے گئے
اور سروں پر ہمارے بٹھائے گئے
علم کب تھا انہیں ہے مخالف ہوا
اس لیے تیر الٹے چلائے گئے
سارے کردار ننگے پڑے دیکھ لو
رب کی جانب سے پردے اٹھائے گئے
اُن کو تاریخ نے میر جعفر لکھا
جو بھی دشمن کے دستے میں پائے گئے
میں قلم سے حقائق کو لکھتا رہا
جھوٹے قصے اگرچہ سنائے گئے
اک ستم ہے روا سالہا سال سے
بولنے والے شب میں اٹھائے گئے
کیا کریں ترجمانی وہ مظلوم کی
راہزن رہنما جب بنائے گئے
ذہنی معذور دکھنے لگے جابجا
جب اچانک دیے سب بجھائے گئے
بند باندھو نہ لوگوں کے اذہان پر
گر ہے دعوی اندھیرے مٹائے گئے
اس وطن کا ہے ماجد یہی المیہ
خیر کے نام پر ظلم ڈھائے گئے
ماجدجہانگیرمرزا