اس راہ میں آتے ہیں بیاباں بھی چمن بھی

غزل

اس راہ میں آتے ہیں بیاباں بھی چمن بھی
کہتے ہیں جسے زیست شبستاں بھی ہے رن بھی

کیا ہو گیا انسان کا وہ شوق شہادت
ویران نظر آتے ہیں اب دار و رسن بھی

بجھ جائے گی مل جل کے اگر پیاس بجھاؤ
گنگا ہی کے نزدیک تو ہے رود جمن بھی

اب لالہ بد اماں نہ کوئی چاک گریباں
ویران چمن ہی نہیں سنسان ہے بن بھی

اک ہم ہی نہیں آبلہ پا دشت و دمن میں
آتے ہیں نظر خاک بسر لالہ بدن بھی

خالی نہیں اب دامن‌ حسرت مرا درشنؔ
ہم راہ وفا مجھ کو ملا عشق وطن بھی

درشن سنگھ