ترے دریدہ گریباں میں یہ رفو کیا ہے

غزل

ترے دریدہ گریباں میں یہ رفو کیا ہے
تجھے خبر نہیں مجنوں کی آبرو کیا ہے

مجھے تو آپ کی آنکھوں نے کر دیا سرشار
مجھے خبر ہی نہیں جام کیا سبو کیا ہے

نہ جانے ہوگا بھی دونوں میں اتفاق کبھی
مزاج حسن ہے کیا میری آرزو کیا ہے

مجاز ہے کہ حقیقت ثواب ہے کہ گناہ
پتہ نہیں کہ یہ دنیائے رنگ و بو کیا ہے

لہو تو وہ ہے جو ابلے شہید کی رگ سے
رگ گلو سے نہ ابلا تو پھر لہو کیا ہے

مجھے ہے جرم محبت کا اعتراف عروجؔ
مری سزا میں کوئی بحث و گفتگو کیا ہے

بڑے بڑوں کے قدم جس مقام پر لرزیں
عروجؔ تو ہی بتا اس جگہ پہ تو کیا ہے

عروج قادری

✦ Ghazal ✦

Tere dareeda garebaan mein ✧ ye rafu kya hai
Tujhe khabar nahin ✧ Majnun ki aabroo kya hai

Mujhe to aap ki aankhon ne ✧ kar diya sarshar
Mujhe khabar hi nahin ✧ jaam kya, saboo kya hai

Na jaane hoga bhi dono mein ✧ ittefaq kabhi
Mizaaj-e-husn hai kya ✧ meri aarzu kya hai

Majaz hai ke haqeeqat ✧ sawaab hai ke gunaah
Pata nahin ke ye ✧ duniya-e-rang-o-boo kya hai

Lahoo to woh hai ✧ jo uble shaheed ki rag se
Rag-e-gulu se na ubla ✧ to phir lahoo kya hai

Mujhe hai jurm-e-mohabbat ka ✧ aitiraaf, Urooj
Meri saza mein koi ✧ behas o guftagu kya hai

Baday baron ke qadam ✧ jis maqam par larzein
Urooj tu hi bata ✧ us jagah pe tu kya hai

– Urooj Qadri