جو کارِ زیست میں مشکل مقام آتے ہیں
ترے خیال مرا حوصلہ بڑھاتے ہیں
قلیل وقتِ طرب ہے ہمارے حصے میں
کشید کرتے ہیں لمحے تو مسکراتے ہیں
انا کے خول سے باہر نکل کے بات تو کر
صد اختلاف سہی ہاتھ تو ملاتے ہیں
یہ شہر سارا ہی فتنہ گروں کی زد پر ہے
چلو تو ہم کوئی بستی نئی بساتے ہیں
شبِ فراق میں یادوں کے اشک پلکوں پر
امید و مہر و وفا کے دیے جلاتے ہیں
جبیں پہ داغ ہیں خاکِ شفا کے میری ضیاء
چراغ بن کے لحد میں جو جگماتے ہیں
ضیاء زیدی