دل کے گوشوں سے جو آوازِ محبت نکلے
پھول صحراؤں میں کھلنے کی بھی صورت نکلے
کتنے آباد مرے شہر کے ویرانے ہیں
کتنے ذی ہوش یہاں مائلِ وحشت نکلے
یوں تو بے نور سی بنجر سی ہیں آنکھیں لیکن
جب کبھی اشک بہے، اشکِ ندامت نکلے
جن کو دیکھا تھا چٹانوں کی بلندی جیسا
پاس جو آئے تو وہ سایہ ء پربت نکلے
اس کی ہر ایک ادا حیلہ ء تسکین بنے
کار۔ ہستی ۔میں اگر تھوڑی سی فرصت نکلے
عمرِ رفتہ پہ کیا ہم نے بھروسہ ناحق
نہیں ممکن ہے کہ یہ باعث۔راحت نکلے
ہم کو اک شخص بھی ایسا نہیں ملتا جو یہاں
بات میں اس کی سدا حرف۔ صداقت نکلے
تو بھی مسمار کرے خواب کسی کے رضیہ
کاش اس طرح کبھی دل کی یہ حسرت نکلے
رضیہ سبحان