عشق میں خاک اے بُتاں ہے زیرِ پا بالائے سر
آب و آتش شمع ساں ہے زیرِ پا بالائے سر
سبزۂ نوخیز و تارِ بارش اے ساقی ہمیں
بن ترے تیر و سناں ہے زیرِ پا بالائے سر
فرش و خیمہ چاہیے کیا خاکساروں کو ترے
یہ زمین و آسماں ہے زیرِ پا بالائے سر
خارِ دشت و داغِ سودا، آہ! مجنوں کی طرح
یاں بھی اے لیلیٰ وَشاں ہے زیرِ پا بالائے سر
خفتگانِ خاک سے ہم کس طرح پوچھیں کہ اب
مسند و افسر کہاں ہے زیرِ پا بالائے سر
جائے نعلین و کلہ شیدا ترا جز مشتِ خاک
اور کیا رکھتا، یہاں ہے زیرِ پا بالائے سر
پوچھ مت ساقی کہ کیوں کر دن کٹے ہیں ہجر کے
کیا بہ عشقِ گل رُخاں ہے زیرِ پا بالائے سر
دودِ آہ و اشک کی دولت سے میں دیکھوں ہوں سیر
ابر اور آبِ رواں ہے زیرِ پا بالائے سر
کچھ سوائے آب رُو پاس اپنے مانندِ گہر
خاک اب اے دوستاں ہے زیرِ پا بالائے سر
کیا کہوں تجھ سے کہ اس رشکِ قمر کی ہر زماں
کیا نصیرِ خستہ جاں ہے زیرِ پا بالائے سر
عکسِ تابِ رخ نہیں ہے مانگ میں سلکِ گہر
چاندنی اور کہکشاں ہے زیرِ پا بالائے سر
شاہ نصیر دہلوی