غزل
لوگ جن کو آج تک بار گراں سمجھا کئے
ہم انہیں لمحوں کو عمر جاوداں سمجھا کئے
موت کو ہم زندگی کی ترجماں سمجھا کئے
قطرۂ دریا کو بحر بیکراں سمجھا کئے
گو حقیقت ہی حقیقت تھی سراپا ہم مگر
زندگی کو داستاں ہی داستاں سمجھا کئے
حسرت سیر گلستاں خواب بن کر رہ گئی
وہ قفس نکلا جسے ہم آشیاں سمجھا کئے
ہاں وہی اک شخص نکلا بے مروت بے وفا
ہم جسے جان تمنا جان جاں سمجھا کئے
ہو گئے اک بار پھر ہم خود فریبی کے شکار
وہ زمیں نکلی جسے ہم آسماں سمجھا کئے
ہائے وہ نکلیں منظم رہزنوں کی ٹولیاں
آج تک جن کو کنولؔ ہم کارواں سمجھا کئے
ڈی راج کنول