نہ چھیڑ قصہ غمِ ہائے دوستی مرے دوست
یہ ایک تلخ فسانہ ہے پھر کبھی مرے دوست
ہر اک کے بس میں کہاں ہے یہ زندگی مرے دوست
گزارتے ہیں جو ہم تم ہنسی خوشی مرے دوست
زمانہ کیسے کرے گا مجھے نظر انداز
گلی گلی مرے دشمن گلی گلی مرے دوست
عجب ہے ہم سفروں کا مزاج کیسے نبھے
ابھی ابھی مرے دشمن ابھی ابھی مرے دوست
کوئی تو عیب ہے مجھ میں جو قرب کے باصف
مرے خلاف ہوئے ہیں خوشی خوشی مرے دوست
یہی ہے طرزِ تعلق تو کس سے کیجے گلہ
کہ جو عدو کے طرف دار ہیں وہی مرے دوست
برنگِ لطف مرا دل دکھانے آتے ہیں
کبھی کبھی مرے دشمن کبھی کبھی مرے دوست
کسی بھی روتے ہوئے آدمی کا ہنس پڑنا
ہنسی نہ جان ہے اظہارِ بے بسی مرے دوست
خود اپنا آپ بھی دشمن دکھائی دیتا ہے
کوئی مذاق نہیں ہے خود آگہی مرے دوست
جو سوچیے تو کوئی بھی یہاں کسی کا نہیں
جو دیکھیے تو ہی اس شہر میں سبھی مرے دوست
تجھے خبر ہے مری اور نہ مجھ کو تیرا پتہ
یہ دوستی ہے تو یہ کب ہے دوستی مرے دوست
خدا کرے کہ میں ہو جاؤں خود میں گم ایسا
مجھے کبھی نہ ستائے تری کمی مرے دوست
اقبال پیرزادہ