پھر نہ اُٹھّا ہے کبھی دست دعا تیرے بعد
یاد آیا ہی کہاں ہم کو خدا تیرے بعد
اب وہ منزل ہے کہ فرقت ہی بھلی لگتی ہے
تیری یادوں نے دیا خوب مزا تیرے بعد
کیسی نظروں سے یہ سب دیکھ رہے ہیں مجھ کو
جرم کیا ایسا کِیا میں نے بھلا تیرے بعد
وہ جو کہتے تھے خدا جوڑی سلامت رکھے
اب وہ دیتے ہی نہیں کوئی صدا تیرے بعد
فکر کپڑوں کی نہ اب بال بنانے کا خیال
سوچتے ہیں کہ سب اچھا ہی ہوا تیرے بعد
شاید اپنی ہی عبادت میں کمی تھی عابدٓ
کچھ یونہی تو نہیں رُوٹھا ہے خدا تیرے بعد
عابد رشید