ہے یقیں حدیثِ ضعیف پر یہ عجیب صورتِ حال ہے

Hay Yaqeen Hadees e zaeef per Yeh ajeeb sorat e Haal Hay

غزل

ہے یقیں حدیثِ ضعیف پر یہ عجیب صورتِ حال ہے
کہوں کیا میں کارِ ثقیف پر یہ عجیب صورتِ حال ہے

کرے کیوں نہ گریہ سخنوری رہے کیوں نہ غم میں یہ مبتلا
کہ ہے جنگ برپا ردیف پر یہ عجیب صورتِ حال ہے

ہے اڑان بھرنے کی آرزو مرے دل کی گلیوں میں در بدر
ہے یہ بار قلبِ نحیف پر یہ عجیب صورتِ حال ہے

یہ زمانہ کھائے گا غش یہاں یہی سچ ہے دیکھنا ایک دن
ہے مجھے بھروسا حریف پر یہ عجیب صورتِ حال ہے

دلِ مضطرب تری آہ پر جہاں خود کو توڑ کے رکھ دیا
وہاں ظلم قلبِ ضعیف پر یہ عجیب صورتِ حال ہے

میں کہوں تو اس پہ کہوں بھی کیا نہیں دیکھتا کوئی فن مرا
ہے نظر لباسِ کثیف پر یہ عجیب صورتِ حال ہے

وہی در بدر رہا عمر بھر وہی تشنہ لب رہا عمر بھر
تھا یقین جس کو حلیف پر یہ عجیب صورتِ حال ہے

ہے یہ مصلحت یا ہے معجزہ کوئی راز اس میں ہے جاوداں
ہے ہجوم دامِ شریف پر یہ عجیب صورتِ حال ہے

ہوا بت کدے میں مشاعرہ تو مری غزل نہ چلی وہاں
ہوا شور شعرِ ظریف پر یہ عجیب صورتِ حال ہے

وہ جو سبز کھیتوں کو کھا گئے وہی مل کے موجِ نسیم اب
کریں شور فصلِ خریف پر یہ عجیب صورتِ حال ہے

نسیم شیخ

Naseem Shaikh