جلتے ہوئے دیے کے برابر سخن کرے
سرگوشیوں میں کون یہ شب بھر سخن کرے
حیرت کے کس مقام پہ ہوتا ہے اس گھڑی
جب آئینے کے سامنے پتھر سخن کرے
میں اس سے ہم کلام ہوں ایسے کہ جس طرح
سورج کے ساتھ موم کا پیکر سخن کرے
رگڑی تھیں میں نے دشت کے سینے پہ ایڑیاں
اب میری تشنگی سے سمندر سخن کرے
باہر ہی نکلتا نہیں جو اپنی ذات سے
اس کم سخن سے کیا دلِ مضطر سخن کرے
میں آگیا ہوں ہجر میں ایسے مقام پر
اب تو چراغ میرے برابر سخن کرے
عرفان کیا کھلا ہے یہ اک بابِ خامشی
اب ہم سے دھوپ چھاؤں کا منظر سخن کرے
عرفان صادق