غزل
تجلی طور کی ہر سو عیاں ہے
مگر ذوق کلیمانہ کہاں ہے
یہی ہے رہبری اے رہنماؤ
نہ منزل ہے نہ منزل کا نشاں ہے
لہو روتا ہے جو اوروں کی خاطر
حقیقت میں وہی دل شادماں ہے
عجب شے ہے رباب زندگی بھی
کبھی نغمہ کبھی آہ و فغاں ہے
اگر وقف محبت ہو تو نعمت
نہیں تو زندگی بار گراں ہے
کرشمہ ہے یہ تیری بے رخی کا
زمیں دشمن فلک نا مہرباں ہے
خرد کی راہ میں برگ گل تر
جنوں کی راہ میں سنگ گراں ہے
سن اے بیداد گر بیگانہ خو سن
یہ خاموشی بھی اک طرز فغاں ہے
منور ہے بشر کا ذہن لیکن
حریم دل ابھی ظلمت نشاں ہے
گلستاں کی فضا اب بھی نہ بدلی
وہی گلچیں وہی برق تپاں ہے
رہائی قید سے بد تر ہے یعنی
دل طائر اسیر آشیاں ہے
مٹانے سے کہاں مٹتی ہے صابرؔ
یہ اردو میرؔ و غالبؔ کی زباں ہے
صابر ابوہری