جب بھی تیرا خیال آتا ہے
دل میں دھم دھم دھمال آتا ہے
اسکے در پر جو سر جھکاتا ہے
دل سے دنیا نکال آتا ہے
اپنے حصے میں ماں کو مانگ لیا
تیرے حصّے میں مال آتا ہے
اس گلی میں ہے ایسا کیا جادو!
ہر کوئی دل نکال آتا ہے
اسکے پاؤں زمیں نہیں چھوتے
جس کے حصے میں مال آتا ہے
وقتِ عبرت وہی تو ہوتا ہے
جب کسی پہ زوال آتا ہے
دل سے بڑھ کر ملنگ کوئی نہیں
اسکو کرنا دھمال آتا ہے
پہلے سالوں میں دن یہ کٹتے تھے
اب تو لمحوں میں سال آتا ہے
اپنا لہجہ سنبھالیئے شائق
اس سے شیشے میں بال آتا ہے
(سید شائق شہاب)