بے منظری میں عشق ھے منظر میں عشق ھے
منظر میں عشق ھے پس ۔منظر میں عشق ھے
صدیوں کے زاویوں میں ھے محوِسفر زماں
ہر دائرے میں عشق ھے محور میں عشق ھے
پیش و پسِ نگاہ ھے اک بار گاہ حسن
وحشت میں عشق رقصِ قلندر میں عشق ھے
دشتِ گماں سے وادی ء ایقاں کی راہ تک
لا حاصلی ھے عشق میسر میں عشق ھے
لہروں کے انگ انگ میں رقصاں ھے جستجو
قطرے میں عشق موجِ سمندر میں عشق ھے
ھے عشق ہجر و وصل کے بستر کی ہر شکن
فرقت میں عشق لمس کی چادر میں عشق ھے
عکسِ جمال کل کے سب ہی منظروں میں ھے
آتش کدے میں عشق ھے پتھر میں عشق ھے
ھے نرم رو کبھی تو کبھی بے اماں خرام
بادِ صبا میں عشق ھے صر صر میں عشق ھے
نیندیں ہیں ایک عمر سے اس کے حصار میں
پروین تیرے خواب کے پیکر میں عشق ھے
پروین حیدر